التخطي إلى المحتوى

في خلال بحثنا دايما عن كل حاجة خاصة بالتخسيس والحصول على الجسم المثالي بتقابلنا نصايح وحيل كتير ومش بنقدر نعرف ايه الفعال منها وايه اللي مش بيجيب نتيجة ومش بنعرف غير لما نجرب حاجات كتير لحد ما نوصل لحاجة , عشان كده من حرصنا اننا نعرف بنات حوا دايما بالحاجات اللي ليها فعالية وتجيب نتيجة جيبنالكم النهاردة تم تجربتهم من محررة في واحدة من المواقع المهتمة بمجال التغذية والصحة حبينا ننقلكم تجربتها, ونعرف ايه الفعال منها وايه اللي مش بيجيب نتيجة.

لكن لازم نعرف حاجة مهمة بردو ان كل جسم بيختلف استجابته عن التاني يعني ممكن اللي يجيب مفعول مع حد ميأثرش مع شخص تاني والعكس.

1- العلاج العطري:

التجربة: اثناء الطبخ, الشهية ممكن تنخفض او تقريبا ممكن تختفي تماما, لان الروايح ممكن تخدع المخ ان المعدة مليانة ومش محتاجة اكل, وده السبب ان الخبراء والمتخصصين بينصحوا انك لما تتبعي نظام غذائي تشمي روايح عطرية زي التفاح او النعناع او الفانيليا عشان تقلل الشهية.

2- غسل الاسنان بالفرشة بدل اكل الحلويات:

التجربة: طريقة تانية لمحاربة الجوع, هو انك تغسلي سنانك بدل ما تاكلي, لان المنثول اللي في المعجون لما بيدخل الفم بيدي اشارة للمخ ان وصلته وجبة.

ايه اللي حصل: فعلا بعد غسيل الاسنان, حصل انه المخ مفكرش في الاكل حتى لو جعانة, والتفكير في الاكل او الوجبة هيجي تقريبا بعد ساعة او ساعتين.

3- الاكل وانتي واقفة:

التجربة: كتير من خبراء واخصائي التغذية بينصحوا انك تاكلي وانتي واقفة, لان الوقوف بيساعد على حرق سعرات حرارية اكتر, ومعدتك هتتملي بسرعة وهتاكلي كمية اكل اقل.

ايه اللي حصل: فعلا بعد التجربة الاكل كان اقل من المعتاد.

4- استخدام الوان باردة للاكل:

التجربة: الاشخاص اللي بياكلوا كتير او شهيتهم دايما مفتوحة الخبراء بينصحوهم بالاكل في اواني فخارية بألوان باردة وخصوصا اللون الازرق والاخضر لان اللونين دول بيساعدوا على تقليل الشهية والتحكم فيها.

ايه اللي حصل: فعلا التجربة نجحت والاكل في اطباق بالالوان دي كان مؤثر والاكل كان بكمية اقل من المعتاد.

5- الاكل في اضاءة خافتة:

التجربة: دي تعتبر نصيحة شعبية من اوروبا, ان الاكل في اضاءة خافتة هيخليكي متلاحظيش كمية الاكل اللي باقية في الطبق قد ايه وبالتالي هتاكلي لما تشبعي وعلى قد ما تحتاجي بس.

ايه اللي حصل: الاكل في الاجواء دي, ممكن يخليكي تاكلي ببطء شوية عشان تتمتعي بالجو اللي حواليكي وهتشبعي اسرع.

6- اختيار الاكل اللي بيتهضم ببطء اكتر:

التجربة: تقريبا الاطباق او الوجبات المتساوية في الوزن وعدد السعرات الحرارية ممكن تاخد وقت مختلف للهضم, على سبيل المثال في الفطار الصبح ممكن يكون البيض افضل من الشوفان لانه هيساعدك ان معدتك تفضل مليانة فترة طويلة ومش هتجوعي لحد وجبة الغدا.

ايه اللي حصل: الفطار بالشوفان بيتهضم بسرعة وتقريبا هتجوعي بعد ساعة واحدة, لكن البيض قعد فترة اطول واخد فترة اطول في الهضم يمكن بسبب انه بيحتوي على دهون, وبالتالي بعد وجبة البيض مافيش جوع لحد وجبة الغدا تقريبا.

: الافضل اكل البيض على الفطار بدل الشوفان.

7- لبس هدوم خروج اثناء الاكل:

التجربة: وانتي لابسة هدوم خروج اثناء الاكل لا اراديا هتتعاملي بشكل رسمي اكتر, وهتاكلي ببطء اكتر, وهتمضغي الاكل اكتر وبشكل بطيء, بالاضافة لده لبس الخروج هيبقى مقيدك وانتي بتاكلي ومش هتبقي واخدة راحتك.

ايه اللي حصل: اللي حصل ان لبس هدوم الخروج اثناء الاكل هيخليكي تخافي توقعي حاجة عليه وبالتالي هتاكلي بحرص جدا وببطء, ونتيجة لده هتاكلي كمية اكل اقل وهتحسي بالشبع بالسرعة.

8- اكل قطعتين شوكولاتة غامقة لو حسيتي بالجوع:

التجربة: الشوكولاتة الغامقة بتمد الجسم بالطاقة, وبتتحكم في الشهية وفي نفس الوقت مافيهاش دهون ممكن تزود الوزن.

ايه اللي حصل: فعلا الحيلة دي نجحت لفترة طويلة, وقطعتين شوكولاتة غامقة قللت من الشعور بالجوع, وبيختفي تماما الرغبة في الاكل لمدة ساعة على الاقل بعد اكلها.

9- تقسيم الاكل:

التجربة: خبراء التغذية بينصحوا بتقسيم الاكل نصين, تاكلي نصه دلوقتي وتأجلي النص التاني لوقت تاني, وممكن كمان تقللي عدد السعرات الحرارية من الفطار للعشا, على سبيل المثال ممكن تاكلي على الفطار اكل فيه سعرات حرارية كتير وده هيديكي طاقة لباقي اليوم كله وده ممكن يساعد انك متاكليش وجبات تانية كبيرة خلال اليوم.

ايه اللي حصل: تقسيم الاكل واكل وجبات صغيرة كل ساعة او ساعتين كانت نتيجته كويسة ومش هيخليكي تحتاجي سناكس او وجبات خفيفة, بالاضافة لده المعدة كانت مرتاحة لانها مش مليانة بشكل كامل وفي احساس بالراحة طول اليوم.

10- مضع كل حاجة 40 مرة:

التجربة: كل ما اخدتي وقت في مضغ الاكل ده هيدي وقت للمخ انه توصله اشارة ان المعدة اتملت, وخبراء التغذية بيقولوا ان 40 مضغة هي العدد الامثل.

ايه اللي حصل: الطريقة دي تعتبر قديمة وتقريبا مؤثرة بشكل جزئي, يمكن مش هتقدري تمضغي 40 مرة بالظبط وا هتقدري تعدي عدد المضغات دي, لكن في النهاية هتكون انك هتاكلي كمية اكل اقل مع المضغ كتير وببطء.

11- استخدام اطباق اصغر:

التجربة: بينصح الخبراء بالاكل في اطباق اصغر لانها هتبان مليانة اكتر بالاكل وهيخليكي تاخدي كمية اكل اقل.

ايه اللي حصل: نفس كمية الاكل اكيد هتبان مختلفة ما بين الطبق الكبير والطبق الصغير, الطبق الصغير هيساعد فعلا انك تاكلي كمية اكل اقل.

التعليقات

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *